आटपाडी पंचायत समिती सभापतीपदी दत्तात्रय पाटील; उपसभापतीपदी कल्पना पुसावळे यांची बिनविरोध निवड
आटपाडी पंचायत समितीत शिवसेनेचे वर्चस्व; सभापतीपदी करगणीचे दत्तात्रय पाटील
Atpadi news: आटपाडी |ज्ञानप्रवाह न्यूज : आटपाडी तालुका पंचायत समितीच्या सभापतीपदी करगणी येथील दत्तात्रय पाटील यांची तर उपसभापतीपदी दिघंची येथील कल्पना पुसावळे यांची बिनविरोध निवड करण्यात आली आहे. या दोन्ही पदांवर निवड झाल्यानंतर तालुक्यातील विविध स्तरांतून त्यांचे अभिनंदन करण्यात येत आहे.
जिल्हा परिषद व पंचायत समिती निवडणुकीचा निकाल लागल्यानंतर आटपाडी पंचायत समितीतील एकूण आठ गणांपैकी चार गणांमध्ये महिलांनी विजय मिळवून महिलांचे प्रतिनिधित्व वाढवले आहे. तसेच एका ठिकाणी तृतीयपंथीय सदस्यानेही विजय मिळवून जनतेचा विश्वास संपादन केला होता. मात्र त्या सदस्याचे आकस्मिक निधन झाल्याने ती जागा रिक्त झाली आहे.
इतर तीन गणांमध्ये पुरुष सदस्य निवडून आले आहेत.पंचायत समिती निवडणुकीत शिवसेना Shiv Sena (शिंदे गट) यांनी पाच जागांवर विजय मिळवत स्पष्ट बहुमत मिळवले, तर भाजप Bharatiya Janata Party चे तीन सदस्य निवडून आले आहेत.
जिल्हा परिषद निवडणुकीत आटपाडी तालुक्यातील चार जागांपैकी दोन जागा शिवसेनेने, एक जागा भाजपने तर एक जागा राष्ट्रवादी काँग्रेस Nationalist Congress Party ने जिंकली आहे.
या पार्श्वभूमीवर पंचायत समितीच्या सभापती व उपसभापती या दोन्ही महत्त्वाच्या पदांवर निवड होताच शिवसेनेने आटपाडी तालुका पंचायत समितीवर आपली सत्ता प्रस्थापित केली आहे. या निवडीमुळे तालुक्यातील राजकीय समीकरणांमध्ये शिवसेनेचे वर्चस्व स्पष्ट झाले आहे.
