‘या’ देशात महागाईचा आगडोंब; दूधाचा दर प्रतिलिटर ११०० रुपयांवर, गॅस सिलिंडर अडीच हजारांवर!

कोलंबो: श्रीलंका सरकारने अत्यावश्यक वस्तूंवरील दरनियंत्रण हटविल्याने नागरिकांचे हाल सुरू झाले आहेत. घरगुती सिलिंडरच्या दरात ९० टक्क्यांची वाढ झाली आहे. २५० रुपयांना मिळणारे एक लिटर दूध आता १,१९५ रुपयांना मिळत आहे. या दरवृद्धीने कमालीचा असंतोष पसरला असून सोशल मीडियावर तीव्र प्रतिक्रिया उमटत आहेत.

राष्ट्रपती गोटाबाया राजपक्षे यांच्या अध्यक्षतेत मागील गुरुवारी झालेल्या मंत्रिमंडळाच्या बैठकीत दरनियंत्रण हटविण्याचा हा निर्णय झाला होता. नियमित घरगुती सिलिंडरचे दर गत शुक्रवारी १,४०० रुपये होते. ते आता २,६५७ रुपयांना मिळत आहे. याप्रमाणे कणिक, साखर आदी अन्य आवश्यक वस्तूंच्याही किमती गगनाला भिडल्या आहेत. सिमेंटचेही दर वाढले आहेत.

महागाईने जनता त्रस्त; मंत्री म्हणतात, लोकांनी कमी खावं!
सर्वाधिक असंतोष सिलिंडरच्या दरात कमालीची वाढ झाल्याने आहे. सरकारने तातडीने दर नियंत्रणात आणावे, अशी मागणी होत आहे. ‘पुरवठा अधिक प्रभावीपणे व्हावा यासाठी मंत्रिमंडळाने दूध पावडर, कणिक, साखर आणि सिलिंडर गॅसवरील दरनियंत्रण हटविण्याचा निर्णय घेतला. या निर्णयाने किमती सुमारे ३७ टक्क्यांनी वाढतील हाही अंदाज होता. मात्र नफेखोर मनमानी किमती वाढवतील असे वाटले नव्हते’, अशी प्रतिक्रिया ग्राहक संरक्षण प्राधिकरणाच्या प्रवक्त्याने दिली.

करोनावरील उपचारासाठी औषधाला मान्यता देण्याची मागणी
दरम्यान, सरकाराने करोना प्रतिबंधासाठी लावलेला सहा आठवड्यांचा लॉकडाउन हटविला आहे. मात्र सार्वजनिक कार्यक्रमांना अजूनही बंदी आहे. रेल्वेगाड्याही सुरू झालेल्या नाहीत. १८ ते १९ वर्षे वयोगटातील विद्यार्थ्यांसाठी सरकार २१ ऑक्टोबरपासून लसीकरण मोहीम सुरू करीत आहे. फायझरची लस दिली जाणार आहे. २० वर्षांवरील सर्व नागरिकांना पहिला डोस देण्यात आलेला असून ८२ टक्के नागरिकांनी दुसरा डोस घेतला आहे, असे आरोग्य मंत्रालयाने सांगितले.