महाराष्ट्र भाजपाने युतीधर्म न पाळता आरपीआयला एकही जागा सोडली नाही
पंढरपूर/ ज्ञानप्रवाह न्यूज – लोकसभा निवडणूक 2024 साठीची निवडणूक प्रक्रिया सुरू झाली आहे.भाजप आणि सर्व सहकारी पक्ष एकीकडे आणि कॉंग्रेस, शिवसेना उध्दव बाळासाहेब ठाकरे, राष्ट्रवादी काँग्रेस शरद पवार आणि इतर सहकारी पक्ष यांच्यामध्ये लढत होईल असे वाटत आहे.मात्र जसजसे निवडणूक जवळ येत आहे त्यावेळी अनेक पक्षांनी आपण स्वतंत्र निवडणूक लढवणार असल्याचे जाहीर केले आहे.
लोकसभा निवडणुकी संदर्भात विचार व्यक्त करताना रिपब्लिकन पक्षाचे प्रदेश सचिव सुनिल सर्वगोड
रिपब्लिकन पार्टी ऑफ इंडिया आठवले गट यांची युती भारतीय जनता पार्टी बरोबर असून असे असताना महाराष्ट्र भाजपाने आरपीआयची युती विसरून मनसे बरोबर युती करून मनसेला जवळ करत गेली दहा वर्ष आरपीआय हा भाजपाचा घटक पक्ष असताना महाराष्ट्र भाजपाने आपला कुठलाही युतीधर्म न पाळता आरपीआयला एकही जागा सोडली नाही.
आरपीआयच्यावतीने भाजप नेत्यांकडे शिर्डी व सोलापूर लोकसभेची मागणी केली होती. असे असताना त्या ठिकाणी आरपीआयला जागा न सोडता सोलापूर लोकसभा मतदार संघासाठी भाजपाने उपरा उमेदवार दिला असून या ठिकाणी आरपीआयचे प्रदेशाध्यक्ष राजाभाऊ सरवदे यांना आरपीआय मधून उमेदवारी देण्याची व सदर जागा आरपीआयला सोडण्याची मागणी केली असतानासुद्धा या मतदारसंघांमध्ये संघ विचारसरणीचा भाजपाने उमेदवार दिल्यामुळे या मतदारसंघात मोठ्या प्रमाणात दलित आणि मुस्लिम मतदारांमध्ये नाराजी दिसत आहे. सोलापूर लोकसभा मतदार संघांमध्ये मोठ्या प्रमाणामध्ये बौद्ध समाजाचे मतदार असून असे असताना सुद्धा जाणून बुजून भाजपाने बौद्ध समाजाच्या भावना दुखवण्याचा प्रयत्न केला आहे .
भाजपाने शिर्डी लोकसभेची जागा आरपीआयचे राष्ट्रीय अध्यक्ष केंद्रीय राज्यमंत्री रामदास आठवले यांना सोडावी अशी मागणी अनेक दिवसांपासून करण्यात आली होती.तीही जागा आरपीआय लाख सोडण्यात आली नाही.
या निवडणुक संदर्भात पुणे कॅंप येथे रिपब्लिकन पार्टी ऑफ इंडिया कोअर कमिटीची विचारविनिमय बैठक घेण्यात आली होती.यासाठी पक्षाचे राज्यभरातील पदाधिकारी उपस्थित होते.यामध्ये आरपीआयसाठी सोलापूर, शिर्डी या लोकसभेच्या जागांसंदर्भात भाजपाने आमच्या मागणीचा फेरविचार न केल्यास महाराष्ट्रात भाजपाच्या विरोधात वेगळा विचार करणार असल्याचे मत या बैठकीत व्यक्त केले.
